فرحانة ... قصدي كنت فرحانة
أتولدت لقيتني وحيده حتى في وسط اخواتي و اهلي و ناسي كله في حاله اللي في شغله و اللي في همه و اللي في فرحه و اللي في زعله كله مع كله عايش ناس فايقة و رايقه و ناس طافحة و ساكتة بس الحقيقة كلنا متغربين حتى و احنا في بلادنا رايحين جايين على لقمة العيش ساعيين ناسيين فين نكون وسط الهموم و وقت ما نقعد لحالنا نلاقي الدنيا بتدور و تفوقنا من الهموم
حاولت و حاولتم و محدش ينكر انه في كل يوم في وقت صمت بنلاقي نفسنا بندور ع الفرح
ححكيلكم حكايتي يمكن تلاقوا فيها اللي شفته صح و يمكن اكون غلط بس الاكيد انكم حتلاقوا شوية من الحقيقة
ع البحر واقفه مع نفسي ببصله و بحكيله سيبوني اتكلم اصله مبيظلمش و لا بيصد و بيسمع الكلام و يبلعه و كمان يهدى وقت الشوق و آه لو ثار و موج عالي شال همي و رماه ده لانه بحر بحب البحر بموت في الشط و بعش رمل البلاج اللي عليه حكاوي لناس كتير هنا جه مهاجريين بايعين و كمان هنا اتلاقى عشاق و جه الحزانى هنا يرموا الهموم و ينسوا العيشة و اللي فيها
هههههههه كآبة و انتوا مش ناقصين المهم
انا زي أي بنت و أي ولد و محدش يقولي انه فيه فرق في كلامي الحب شئ جميل حاجة احتياج كلنا عايزينه او ع الاقل نحس بيه اصله حياة الروح و نبض القلوب و عشق العقول و حلم السكرانين و طلب الضعفانين و مياة العطشانين و ببلاش كمان مبيدفعشي فيه فلوس لانه ما يساويهوش كنوز من سنين اول ما عيني فتحت لقيت كريم بيبصلي و يبصلي و في نظرة عيونه شوق معرفشي ليه اتشديت و اترميت فكرت و اتهديت و نسيت و لقيتني معاه هنا بتكلم وياه كلامه حلو و بصاته احلى اول مره حد يحسسني اني كبيره بيناقش و يسأل و انا اجاوب و مش غلط و صح و نجمتين و امتياز لأ
ده مش مدرس و لا ابويا و لا امي ده حد عايز يسمعني و عايز يعرفني مين انا و مين هو نهايته حسيتا ول مره يكون لي رأيي و حد يهتم بيا انا و اتقابلنا كتير و بدأت قصة حب مش عارفها سموها كده و بعد كده ابقوا قولوا عليا اللي تقولوه زاد كلامنا و اتعلقنا و اتشديته بكل كياني عطيته كل حبي و هيامي كنت بسهرله و كنت باخد مصروفه واروحله و كنت بنسى نفسي معاه باسني و حضني عشق روحيين كانوا في لحظة توهان يااااااااااه كنت بدوب كنت بصرخ و املي الدنيا صوت مش مش عاجبين حد انما مش هاميمنا حد كل اللي فاهماه اني بحبه و هو كمان قالي بحبك و كبرت شوية و فهمت الزواج و اتغير الحضن من دفا لغليان نار تحرق و صهد يولع و حيرة تغير و ناس واقفة و عادات و تقاليد و البنت مالها الا شرفها صدوني مفرطش فيه مع اني كنت مستعدة اديله عمري و اغلى من شرفي بس كنت فهمت انه الجواز ده الحياة و قلتله قالي :
لسه مش جاهز و لسه بدرس و كمان لسه حسافر و اكون نفسي عايز اعملك بيت قصر يليق بيكي عايز اشرفك و اسعدك و نكون و نكون و اعمل و اسوي بحر اوهام رسمه لطريقنا و جه يوم سفره و كتبنا ورقتين الاولي ليه و التانيه ليا يكملوا بعض بالشهادة و ع البحر سكتنا و فرغت شفايفي جوه شفايفه و داب جسمي جوه حضنه و كان الفراق راح كريم و مرجعشي
مش عارفه عيبي و لا عيبه مش عارفه مين فينا الغلطان جسمي و قالي حلو و كلامي و قال كروان فكري و قال هيمان و قال و قال مش عارفه ليه كانت النهاية حزينة اصلي اتحطمت و انصدمت ما انا خلصت دراسة و بقيت فاضية و كان هو مالي عليا دنيتي و دلوقتي مش لاقيه ونيس قلتلكم كلهم مشغولين بابا تعيشوا انتم و ماما بتجري وتكد و تتعب واخواتي كله في شغله عايز يبني القصر
و دارت الايام و كل يوم اروح فيه البحر الاقي عشاق و الاقي حيارى و الاقي اطفال و ناس ساكته و ناس بتظأطط و ناس بتنطط و ناس تايهه بتفكر و مين ملوش حكاية يحكيها للبحر مش حيسأل و لا حيعارض و كنت بدور ع الحب و نفس الحوار بدأ و انتهى مع رأفت و نفس النهاية بس ده سافر و رجع بمراته و مبقيتش ادور بقيت اتفرج بقيت اقول السعادة مش حب يملى القلب و لا فكر يسهر قلب
السعاده مش حاجة و لا كلام و لا طلب فعل و شريان ... السعاده روح رايحه ترفرف على قلب الواحد فينا ترميه هناك في الجنة ترسم خطوطها و تتمنى تنسى الهموم و تعلي الاحلام حتى لو اوهام بعد بعيد و هم بعيد المهم الوقتي يكون فرحان
حد يشوفلي قلب يعشق روح و عقل يفكر في كلام و راجل مش عايز بس جسمي حد يكون عايز مني اسعده و يكون ليا و اكون ليه مش قصة تكون حكاية من الف ليلة و ليلة و ربي مستعده اكون شهر زاد و يقتلني بس ع الاقل و انا معاه
لو عرفت سوقا للسعادة لرهنت نفسي و روحي فداها و لكن مات بائعوها في زمن المرجيحة
Ahmed oraby
4 التعليقات:
و ما زال الأمل لم يمت بداخلي و سأظل انتظرك يا من ستوهبني السعادة بـحـبـك حتى لو لم يمهلني القدر الا لحظة أعيشها معك فهذه اللحظة هي عمري الحقيقي الذي اضعت امدا أبحث عنه لن أيأس و سأظل أنتظره
" همت مصطفى "
اكتر من روعه ووجعتني وعبرة عني فعلا بعشق البحر واعشق السباحه فيه وانسى همومي واتغسل واجري علىرمله وامشي كتير ولا اتعب ابدا بل يزيد قوتي وحبي تعرف تصرخ وانته حر بلا قيود بلا اي حدود تعبر عن الي جواك بصدق اه اه اه اه اه اه اه فكرتني ليه بس نستنا الصيف يجي لنترمي في حضنه ونملي عنينا منه ولما يجي الشتاء بنتصبر بالمطره وندعي ونجري تحتها وبتحضنا هيه والبحر بدل حضن الحبيب يا رببببببببببببببب الهمنا الصبر وداوي الجروح محدش يعرفها غيرك يا ارحم الراحمين
اللهم الهمنا الصبر و اكرمنا السعادة و الفرح
و داوي أي جرح
و يسلم مروك
اصدقائى الفرحه فى وجدنا على الشاطى هى فرحه الانطلاق من الخمول والكتمان الى مايسمى بالانطلاق باشكاله وكل واحد بيكون على الشاطى له شكل خاص بيه من الانطلاق مش بيفرط فى لحظه انه يضيع منه
والسعاده مش كلام وبس السعاده هى افعال قبل ما تكون اقوال وقت ماتحسها لازم تكون افعال عشان تقدر تحافظ عليها لانها لو اقوال بتضيع وسط ذحام افعال الاخرين وبتكون وقتها احزان واحزان شديده كمان لاننا كنا عامين عنينا عنها ووقت ما استوعبناها ادركنا انها احزان شديده
المهم اننا مش نمكنها مننا ولا نخليها عايشه جوانا لان اكيد فى السعاده اللى هتتعملنا بالافعال مش بالاقوال
اللهم اسعد وافرح واكرم فتيات وفتيان امه حبيبك محمد اجمعين
إرسال تعليق